Al Mia Unua Nepo
Joslyn Stanton Baum
Bookleaf Publishing
Esperanto-fako
59B Lukin St
Beverley WA 6304
Aŭstralio
Unue eldonita 1909
en la Angla lingvo
kun la titolo
The Road to Oz
En la antaŭparolo de "Doroteo kaj la Sorĉisto en Oz" mi diris ke mi deziras verki kelkajn rakontojn kiuj ne estas "Oz"-rakontoj, ĉar mi opiniis ke mi jam verkis tute sufiĉe pri Oz; sed de post la publikiĝo de tiu volumo min inundas leteroj de infanoj petegantaj min "verki pli pri Doroteo", kaj "pli pri Oz", kaj ĉar mi verkas nur por plaĉi al la infanoj mi penos respekti iliajn dezirojn.
Estas kelkaj novuloj en ĉi tiu libro kiujn certe vi ekamos. Mi mem tre amas la vilulon, kaj mi kredas ke ankaŭ vi amos lin. Kaj Polikromo -- la Filino de la Ĉielarko -- kaj stulta malgranda Buton-Brilo ŝajne alportis novan ĝojon en ĉi tiujn Oz-rakontojn, kaj mi ĝojas ĉar mi trovis ilin. Tamen mi fervore volas ke vi skribu kaj diru al mi ĉu ankaŭ al vi ili plaĉas.
Post kiam mi verkis ĉi tiun libron mi ricevis tre rimarkindajn informojn el la Lando Oz, kiuj multe surprizis min. Mi kredas ke ili ankaŭ vin surprizos, karuloj, kiam vi aŭdos ilin. Sed tiu rakonto estas tiel longa kaj ekscita ke necesas ke ĝi atendu por aperi en nova libro -- kaj eble tiu libro estos la lasta rakonto iam rakontota pri la Lando Oz.
L. Frank Baum
Coronado, 1909.
Ĉapitro 1: Vut la Vagisto